Што пагражае дзікай прыродзе Палесся?

Некранутаму ландшафту Палесся пагражаюць змены клімату, будаўніцтва дарог і інфраструктуры, парушэнне цэласнасці рэгіёну, асушэнне балот, інтэнсіўныя высечкі лясоў, пажары, нелегальная здабыча карысных выкапняў і няўстойлівае прыродакарыстанне.

Водны шлях E40

Згодна з праектам, гэты водны шлях мусіць звязаць Балтыйскае і Чорнае моры. Калі задумка ўвасобіцца,  гэта татальна зменіць выгляд адной з апошніх у Еўропе натуральных рэк – Прыпяці. Ідэю воднага шляху E40 прапанавалі прадстаўнікі Беларусі, Польшчы і Украіны. Для прасоўвання ініцыятывы ў 2013 годзе быў заснаваны спецыяльны камітэт. Калі ў яго атрымаецца рэалізаваць сваю місію, ландшафты і дзікая прырода Палесся катастрафічна зменяцца: E40 разрэжа на дзве часткі ахоўныя тэрыторыі і парушыць натуральныя сувязі ўнутры папуляцый важных відаў раслін і жывёл. Праз спраставанне Прыпяці шматлікія меандры і вялікія тэрыторыі поймаў могуць высахнуць, а значыць, знікнуць і месцы пражывання рэдкіх відаў.

Чытай больш пра E40.

Некантраляваны збор ягад

Абшары палескіх лясоў і балот незвычайна шчодрыя на ягады – асабліва журавіны і брусніцы. Для мясцовага насельніцтва гэта надзвычай важны эканамічны рэсурс. Але высокая актыўнасць зборшчыкаў негатыўна ўплывае на мясцовы раслінны і жывёльны свет. Пад пагрозай апынуўся ландшафтны заказнік “Альманскія балоты”. Альманы – гэта 100 тысяч гектараў натуральных балот, якія маюць прыродаахоўнае значэнне для Еўропы і ўсяго свету. Улетку і ўвосень у гэтую мясцовасць імкнецца мноства зборшчыкаў ягад, якія нелегальна будуюць дарогі і часовыя стаянкі ў лясах, топчуць расліннасць, правакуюць пажары. Да таго ж такая дзейнасць шкодзіць чуллівым у перыяд размнажэння жывёлам, такім як вялікі арлец, які знаходзіцца пад пагрозай знікнення. Калі патурбаваць гняздо вялікага арляца, ён можа нават пакінуць сваіх птушанят.

Здабыча бурштыну

Незаконная здабыча бурштыну ў апошнія гады ўзрасла ва ўкраінскай частцы Палесся. Там бурштын здабываюць шляхам высякання дрэў на буйной тэрыторыі, раскопвання ямаў і прапампоўвання вады пад зямлёй. Бурштын збіраюць, калі ён выплывае на паверхню. Такая дзейнасць пакідае па сабе толькі спустошаны голы пейзаж. Такі спосаб здабычы бурштыну незаконны, але надзвычай прыбытковы. Спробы ўкраінскага ўрада і вайскоўцаў спыніць гэтую дзейнасць пакуль не дасягнулі мэты.

Дадзены праект з’яўляецца часткай праграмы абароны прыродных ландшафтаў, якія знаходзяцца пад пагрозай знікнення (Endangered Landscapes Programme), і фінансуецца са сродкаў дабрачыннага фонду Лізбет Раўсінг і Пітэра Болдуіна «Аркадзія». Праект каардынуецца Франкфурцкім заалагічным таварыствам і рэалізуецца ў супрацоўніцтве з Брытанскім трастам па арніталогіі.