Неабсяжныя балоты, шырокія поймы і паплавы
Палессе – адна з найбуйнейшых тэрыторый дзікай прыроды ў Еўропе. Неабсяжныя палескія балоты, поймы рэк і паплавы - дом для вялікай колькасці спецыфічных балотных відаў жывёл і раслін, якім пагражае знікненне.Балоты і лясы Палесся месцяцца пераважна на тэрыторыі сучасных Беларусі і Украіны, але маюць працяг на ўсходзе ў Расіі і на захадзе – у Польшчы. Цалкам раўнінны рэгіён раскінуўся на плошчы ў больш чым 18 мільёнаў гектараў, што параўнальна з паловай плошчы Германіі.
Разнастайнасць біятопаў
Асноўная частка Палесся ляжыць у межах Беларусі і Украіны і сфармавана ракой Прыпяць. Прыпяць – адна з найбуйнейшых рэк Еўропы, якая не была спраставаная, перанакіраваная ці іншым чынам мадыфікаваная. Яна ўсё яшчэ мае бясконцае мноства меандраў, прытокаў, старыц і затопленых берагоў – усё гэта робіць мясцовы ландшафт унікальным. Такога спалучэння рэк, астравоў, балот, багнаў і поймавых лясоў не знайсці больш нідзе ў Еўропе.
Палессе – адзін з найбуйнейшых у Еўропе натуральных водна-балотных комплексаў. Ён славіцца агромністымі абшарамі балот і паплавоў. Тут знаходзяцца Альманскія балоты, што займаюць плошчу ў 100 тысяч гектараў. Яны прызнаныя найбуйнешым у Еўропе комплексам, што сумяшчае ўсе тыпы балот.
Вялікі еўрапейскі міграцыйны шлях
Пойма Прыпяці – улюбёнае месца адпачынку вадаплаўных і балотных птушак, чые міграцыйныя шляхі пралягаюць праз Палессе ўвосень і ўвесну. Птушкі, што знаходзяцца пад пагрозай глабальнага знікнення, такія як вяртлявая чаротаўка, вялікі арлец, гусь-піскулька, дзяркач і кулік-марадунка, выкарыстоўваюць забалочаныя тэрыторыі для размнажэння, адкорму і адпачынку паміж міграцыямі. Сотні тысяч птушак затрымліваюцца на Палессі падчас пералётаў, у тым ліку 350 тысяч свіцьваў, 200 тысяч баталёнаў і 30 тысяч грыцукоў на год. Больш нідзе ў Цэнтральнай і Заходняй Еўропе няма такой канцэнтрацыі баталёнаў і вялікіх грыцукоў, як у пойме Прыпяці.
Дзікая прырода Палесся
Палессе – дом для вялікай колькасці відаў, якія знаходзяцца пад пагрозай знікнення, такіх як вяртлявая чаротаўка, вялікі арлец, вялікі кулён і еўрапейская норка. Гэта таксама рай для буйных сысуноў – бурага мядзведзя, ваўка, рысі і зубра. Вялікія абшары натуральных паплавоў забяспечваюць шматлікія віды рыб (напрыклад, еўрапейскага вугра) адмысловымі ўмовамі для нерасту. У поймах палескіх рэк пражывае багата земнаводных, узрастае шмат рэдкіх раслін, што патрабуюць аховы.
Асабліва ахоўныя прыродныя тэрыторыі з міжнародным статусам
Шмат тэрыторый Палесся прызнаны міжнародна значнымі і маюць такія прыродаахоўныя статусы як біясферны рэзерват ЮНЕСКА, тэрыторыі важныя для птушак, Emerald Network, Рамсарскія ўгоддзі.Разам з тым, сістэма асабліва ахоўных прыродных тэрыторый Палесся патрабуе ўдасканалення дзеля больш эфектыўнай аховы відаў і ландшафтаў, што знаходзяцца пад пагрозай знікнення.
Дадзены праект з’яўляецца часткай праграмы абароны прыродных ландшафтаў, якія знаходзяцца пад пагрозай знікнення (Endangered Landscapes Programme), і фінансуецца са сродкаў дабрачыннага фонду Лізбет Раўсінг і Пітэра Болдуіна «Аркадзія». Праект каардынуецца Франкфурцкім заалагічным таварыствам і рэалізуецца ў супрацоўніцтве з Брытанскім трастам па арніталогіі.